Skráningarfærsla handrits

Ættartölubók eftir Jón Gunnlaugsson á Skjöldólfsstöðum um 1684, umbætt og aukin af Sigurði Jónssyni á Höskuldsstöðum í Breiðdal, en hann hafði áður verið lögréttumaður í Hegranesþingi.

Á fáeinum stöðum bregður fyrir hendi Árna prófessors Magnússonar í athugasemdum.

Bókin hefur að geyma lauslegar ættarrakningar frá nokkrum heldri mönnum.

Nokkrar lausavísur um nytsemi ættartalna eru þar (næst eftir formála) eftir síra Gunnar Árnason að Stafafelli, Hallgrím Jónsson Thorlacius (síðar sýslumann) og síra Guðmund Högnason að Hofi í Álftafirði.

Titilblað og efnisskrá er framan við með hendi Páls stúdents Pálssonar.

Bókin hefur hingað til verið talin frumrit (ekki er nefnt, hvort heldur Jóns á Skjöldólfsstöðum eða Sigurðar á Höskuldsstöðum), en ekki verður betur séð en að hún sé með hendi Jóns sýslumanns Þorlákssonar í Berunesi, og honum var bókin ætluð, sbr. formála Jóns á Skjöldólfsstöðum framan við.