Detaljer om håndskriftet

Fyrir árin 1660-1662.

Ólafur Hallgrímsson kvittar fyrir að Brynjólfur biskup hafi greitt sér 9 ríkisdali fyrir kýr sem faðir hans, Hallgrímur Halldórsson, seldi Brynjólfi biskup vorið 1660. Dags. á Þingvöllum 29. júní 1660.

Fyrsta bréfið er nr. 4. Ekkert vantar framan á bókina.

Brynjólfur biskup staðfestir að Daði Eggertsson hafi greitt honum 48 ríkisdali, fyrir hönd Þorleifs Magnússonar. Þessir 48 ríkisdalir voru tveggja ára biskupstíundir úr Barðastrandarsýslu sem Þorleifur tók saman fyrir biskup. Dags. á Þingvöllum 30. júní 1660.

Samþykki Þorgríms Guðmundssonar, fulltrúa sýslumanns á Austfjörðum, þess efnis að Brynjólfur biskup fái afhent sex leigukúgildi með jörðunum Gröf og Skálanesi í Vopnafirði sumarið 1660. Jafnframt staðfestir hann að jarðirnar verði afhentar biskupi eða umboðsmanni hans. Sjá AM 272 fol., nr. 257-259. Dags. á Þingvöllum 30. júní 1660. Afrit dags. á Þingvöllum 30. júní 1660.

Sr. Einar Torfason gefur frá sér allt tilkall sem hann taldi sig hafa til stöðu rektors við Skálholtsskóla á prestastefnu á Þingvöllum sumarið 1660. Sr. Einar hafði meðmælabréf frá konungi fyrir embætti rektors en Brynjólfur biskup vildi ekki veita honum það. Í staðinn óskar sr. Einar eftir því að biskup aðstoði hann við að fá kennimannsembætti sem hæfi honum. Dags. á Þingvöllum 30. júní 1660.

Brynjólfur biskup afhendir Hjalta Jónssyni, umboðsmanni sínum á Austfjörðum, 24 ríkisdali upp í andvirði jarðarinnar Saurstaða. Dags. á Þingvöllum 30. júní 1660.

Staðfesting Brynjólfs biskups þess efnis að Stefán Einarsson hafi skilað biskupstíundum úr Skaftafellssýslu sem gjaldast áttu vorið 1660. Einnig veitir biskup Stefáni Einarssyni áframhaldandi biskupstíundarumboð. Dags. í Skálholti 2. júlí 1660.

Uppskrift af gömlu innsigluðu jarðakaupabréfi fyrir jörðunum Torfastöðum og Skálanesi í Vopnafirði. Bréfið var skrifað árið 1398 og afrit þess árið 1487. Þar kemur fram að Ólafur Jónsson hafi selt sr. Guðmundi Þorsteinssyni jörðina Bessastaði í Fljótsdal. Á móti seldi sr. Guðmundur Ólafi jörðina Torfastaði og jarðirnar tvær að Skálanesi í Vopnafirði. Í bréfinu er gerð grein fyrir landamerkjum jarðarinnar Torfastaða og Skálanessjarðanna tveggja. Dags. 1398 og 1487. Afrit dags. í Skálholti 3. júlí 1660.

Jarðakaupabréf dagsett 6. ágúst 1595 á Egilsstöðum á Fljótsdalshéraði og skrifað upp eftir frumritinu fyrir Brynjólf biskup. Í bréfinu kemur fram að Þórður Björnsson bóndi hafi selt Oddi Einarssyni Skálholtsbiskup alla jörðina Nyrðra Skálanes í Vopnafirði, átta hundruð að dýrleika. Í bréfinu er lýst landamerkjum jarðarinnar Nyrðra Skálaness. Dags. á Egilsstöðum á Fljótsdalshéraði 6. ágúst 1595. Afrit dags. í Skálholti 3. júlí 1660.

Vitnisburður Björns Jónssonar um landamerki jarðarinnar Torfastaða í Vopnafirði. Dags. í Skálholti 3. júlí 1660.

Afrit af bréfi þar sem sex dómkvaddir menn kváðu upp dóm um að Ásbrandsstaðasandur væri eign jarðarinnar Ásbrandsstaða í Vopnafirði. Dags. á Burstafelli fimmta í páskum 1553. Afrit dags. í Skálholti 3. júlí 1660.

Afrit af jarðakaupabréfi frá árinu 1561 þar sem Stefán Snorrason seldi Oddi Kolbeinssyni jörðina Syðri Vík í Refsstaðakirkjusókn, 18 hundruð að dýrleika. Í bréfinu er að finna lýsingu á landamerkjum jarðarinnar Syðri Víkur. Dags. mánudaginn fyrir páska 1561. Afrit dags. í Skálholti 7. júlí 1660.

Jarðakaupabréf þar sem Hjalti Jónsson seldi Brynjólfi biskup 3 hundraða hlut í jörðinni Snotrunesi á Borgarfirði eystri. Fyrir þennan jarðarhlut greiddi Brynjólfur biskup Hjalta sjö og hálft hundrað í lausafé. Dags. í Skálholti 3. júlí 1660.

Yfirlit yfir reikningsviðskipti Brynjólfs biskups við Hjalta Jónsson, umboðsmann jarða biskups á Austfjörðum, frá árinu 1657 til ársloka 1659. Dags. í Skálholti 3. júlí 1660.

Yfirlit yfir allar jarðir og jarðahluta í eigu Brynjólfs biskups á Austfjörðum, landskuld þeirra og kúgildi, eins og eignaskráin stóð 3. júlí 1660. Dags. í Skálholti 3. júlí 1660.

Afrit af bréfi dagsettu 6. febrúar 1646 þar sem þrír erindrekar sr. Vigfúsar Árnasonar og þrír erindrekar Brynjólfs biskups voru fengnir til að meta og rannsaka, eftir þeirra skynsemi, rétt landamerki á milli jarðanna Ytri og Syðri Nýpa í Vopnafirði. Í bréfinu er lýst réttum landamerkjum á milli jarðanna, samkvæmt þeirra niðurstöðu. Dags. 6. febrúar 1646. Afrit dags. í Skálholti 7. júlí 1660.

Afrit gert eftir frumriti jarðabréfs dags. 17. júlí 1646. Í bréfinu seldi sr. Sigurður Bjarnason Brynjólfi biskup 5 hundraða hlut í jörðinni Búastöðum í Vopnafirði. Á móti lofaði biskup að selja sr. Sigurði fimm hundraða hlut í annarri jafngóðri fastaeign. Samninginn gerði Hjalti Jónsson, umboðsmaður jarða Brynjólfs biskups á Austfjörðum, fyrir hönd biskups. Dags. í Hestgerði í Hornafirði 17. júlí 1646. Afrit dags. í Skálholti 7. júlí 1660.

Afrit gert eftir frumriti jarðabréfs dagsettu 14. ágúst 1648. Í bréfinu seldi Ingibjörg Jónsdóttir Brynjólfi biskup hálfa jörðina Hof í Fellum, en öll jörðin reiknaðist 20 hundruð að dýrleika. Á móti seldi Brynjólfur biskup Ingibjörgu 5 hundraða hlut í jörðinni Búastöðum í Vopnafirði og 10 hundruð í lausafé. Samninginn gerði Hjalti Jónsson, umboðsmaður jarða Brynjólfs biskups á Austfjörðum, fyrir hönd biskups. Dags. á Hafrafelli í Fellum 14. ágúst 1648. Afrit dags. í Skálholti 7. júlí 1660.

Engin bréf nr. 21-26. Engin blöð vantar í bókina.

Sr. Rögnvaldur Einarsson, móðurbróðir Ingibjargar Jónsdóttur, gefur Brynjólfi biskup samþykki sitt fyrir sölu Ingibjargar á jörðinni Hofi í Fellum til biskups. Sjá bréf nr. 20. Dags. á Meðalnesi á Fljótsdalshéraði 14. mars 1651. Afrit dags. í Skálholti 7. júlí 1660.

Jarðakaupabréf frá árinu 1649 afritað í Skálholti. Í bréfinu seldi Bjarni Ögmundsson Brynjólfi biskup hálfa jörðina Setberg í Fellum, 5 hundruð að dýrleika. Á móti seldi Brynjólfur biskup Bjarna 5 hundraða hlut í annarri ónefndri jörð. Samninginn gerði Hjalti Jónsson, umboðsmaður jarða Brynjólfs biskups á Austfjörðum, fyrir hönd biskups. Dags. að Meðalnesi í Fellum 5. júní 1649. Afrit dags. í Skálholti 7. júlí 1660.

Jarðakaupabréf frá árinu 1649 afritað í Skálholti. Í bréfinu seldi Guðbrandur Bessason Brynjólfi biskup hálft níunda hundrað í jörðinni Geitdal í Skriðdal. Á móti seldi Brynjólfur biskup Guðbrandi jörðina Hof á Norðfirði, 6 hundruð að dýrleika. Samninginn gerði Hjalti Jónsson, umboðsmaður jarða Brynjólfs biskups á Austfjörðum, fyrir hönd biskups. Dags. að Vík á Fáskrúðsfirði 14. febrúar 1649. Afrit dags. í Skálholti 7. júlí 1660.

Jarðakaupabréf frá árinu 1649 afritað í Skálholti. Í bréfinu seldi Oddur Teitsson Brynjólfi biskup alla jörðina Hrafnabjörg í Útmannasveit, sex hundruð að dýrleika. Á móti seldi Brynjólfur biskup Oddi Teitssyni 3 hundraða hlut í jörðinni Sandvík á Norðfirði og tvö hundruð og 40 eða 50 álnir í jörðinni Fannardal í sömu sveit. Samninginn gerði Hjalti Jónsson, umboðsmaður jarða Brynjólfs biskups á Austfjörðum, fyrir hönd biskups. Dags. að Meðalnesi í Fellum 23. febrúar 1649. Afrit dags. í Skálholti 7. júlí 1660.

Jarðakaupabréf frá árinu 1651 afritað í Skálholti. Í bréfinu seldi Brynjólfur biskup sr. Rögnvaldi Einarssyni 5 hundraða hlut í jörðinni Eskjufirði í Hólmastaðarkirkjusókn. Á móti seldi sr. Rögnvaldur Brynjólfi biskup hálft sjöunda hundrað í jörðinni Bárðarstöðum í Loðmundarfirði. Það sem eftir stóð af virði jarðarinnar, hálft sjötta hundrað, færði sr. Rögnvaldur Brynjólfi biskup til eignar. Í staðinn tók Brynjólfur biskup Árna, son sr. Rögnvaldar, að sér og veitti honum skólavist í Skálholtsskóla. Samninginn gerði Hjalti Jónsson, umboðsmaður jarða Brynjólfs biskups á Austfjörðum, fyrir hönd biskups. Dags. að Meðalnesi í Fellum 14. mars 1651. Afrit dags. í Skálholti 7. júlí 1660.

Þrír erindrekar, Ásmundur Jónsson, Stefán Jónsson og Kolbeinn Sigurðsson, gera úttekt á húsum jarðarinnar Hafrafells að beiðni Hjalta Jónssonar, umboðsmanns jarða Brynjólfs biskups á Austfjörðum. Dags. að Hafrafelli 7. júní 1659. Afrit dags. í Skálholti 7. júlí 1660.

Jón Jónsson á Vindfelli kvittar fyrir að Hjalti Jónsson hafi greitt honum að fullu andvirði jarðarinnar Fossgerðis sem Hjalti keypti af honum, fyrir hönd Brynjólfs biskups. Dags. að Vindfelli í Vopnafirði 18. apríl 1660. Afrit dags. í Skálholti 7. júlí 1660.

Jarðabréf þar sem Árni Árnason seldi Brynjólfi biskup eins hundraðs hlut í jörðinni Kjólsvík á Borgarfirði eystri. Fyrir þennan jarðarhlut greiddi Brynjólfur biskup Árna hálft þriðja hundrað í lausafé. Samninginn gerði Hjalti Jónsson, umboðsmaður jarða Brynjólfs biskups á Austfjörðum, fyrir hönd biskups. Dags. á Ketilstöðum í Jökulsárhlíð 14. janúar 1660. Afrit dags. í Skálholti 7. júlí 1660.

Jarðabréf þar sem Jón Rafnsson, með samþykki Cæcilíu Arngrímsdóttur eiginkonu sinnar, seldi Brynjólfi biskup 3 hundraða hlut í jörðinni Þorvaldsstöðum í Skriðdal. Fyrir þennan jarðarhlut greiddi Brynjólfur biskup þeim hjónum sjö hundruð í lausafé sem skyldu greiðast um næstu fardaga. Samninginn gerði Hjalti Jónsson, umboðsmaður jarða Brynjólfs biskups á Austfjörðum, fyrir hönd biskups. Dags. á Ketilstöðum í Jökulsárhlíð 14. janúar 1660. Afrit dags. í Skálholti 7. júlí 1660.

Jón Rafnsson kvittar fyrir að Hjalti Jónsson hafi greitt honum sjö hundruð sem var greiðsla fyrir 3 hundraða hlut í jörðinni Þorvaldsstöðum í Skriðdal. Sjá bréf nr. 35. Dags. að Meðalnesi í Fellum 3. júní 1660. Afrit dags. í Skálholti 7. júlí 1660.

Jarðabréf þar sem Þórður Árnason seldi Brynjólfi biskup eins hundraðs hlut í jörðinni Kjólsvík á Borgarfirði eystri. Fyrir þennan jarðarhlut greiddi Brynjólfur biskup Árna tvö hundruð og fimm aura í lausafé sem skyldu greiðast um næstu fardaga. Samninginn gerði Hjalti Jónsson, umboðsmaður jarða Brynjólfs biskups á Austfjörðum, í umboði biskups. Dags. á Desjamýrarstað 22. júní 1659. Afrit dags. í Skálholti 7. júlí 1660.

Jarðabréf þar sem Marteinn Magnússon seldi Brynjólfi biskup hálft þriðja hundrað í jörðinni Snotrunesi á Borgarfirði eystri. Fyrir þennan jarðarhlut greiddi Brynjólfur biskup Marteini fimm hundruð í lausafé, sem greiðast skyldu nú þegar, og ábýli á hálfri jörðinni Brúnavík á Borgarfirði eystri svo lengi sem Marteinn kýs. Samninginn gerði Hjalti Jónsson, umboðsmaður jarða Brynjólfs biskups á Austfjörðum, í umboði biskups. Dags. í Njarðvík á Borgarfirði eystri 15. júlí 1659.

Jarðabréf þar sem Bárður Magnússon seldi Brynjólfi biskup hálft þriðja hundrað í jörðinni Snotrunesi á Borgarfirði eystri. Fyrir þennan jarðarhlut greiddi Brynjólfur biskup Bárði ótilgreinda upphæð í lausafé. Samninginn gerði Hjalti Jónsson, umboðsmaður jarða Brynjólfs biskups á Austfjörðum, í umboði biskups. Gerð er nánari grein fyrir jarðakaupaskilmálum í næsta bréfi, nr. 40. Dags. í Njarðvík á Borgarfirði eystri 15. júlí 1659. Afrit dags. í Skálholti 7. júlí 1660.

Jarðabréf þar sem Bárður Magnússon seldi Brynjólfi biskup hálft þriðja hundrað í jörðinni Snotrunesi á Borgarfirði eystri. Fyrir þennan jarðarhlut greiddi Brynjólfur biskup Bárði fimm hundruð í lausafé, sem skyldu greiðast nú þegar, auk ábýlis á hálfri jörðinni Brúnavík á Borgarfirði eystri svo lengi sem Bárður kýs. Samninginn gerði Hjalti Jónsson, umboðsmaður jarða Brynjólfs biskups á Austfjörðum, fyrir hönd biskups. Dags. í Snotrunesi á Borgarfirði eystri 15. júlí 1659. Afrit dags. í Skálholti 7. júlí 1660.

Jarðabréf þar sem Einar Magnússon seldi Brynjólfi biskup þriggja hundraða hlut í jörðinni Snotrunesi á Borgarfirði eystri. Fyrir þennan jarðarhlut greiddi Brynjólfur biskup Einari þriggja hundraða hlut í jörð sem þeim um semur og gjaldast muni með tímanum. Á meðan þessi hlutur stendur ógreiddur mun biskup gjalda Einari fimm aura afgift árlega. Samninginn gerði Hjalti Jónsson, umboðsmaður jarða Brynjólfs biskups á Austfjörðum, fyrir hönd biskups. Dags. að Hjaltastað í Útmannasveit 15. júlí 1659. Afrit dags. í Skálholti 7. júlí 1660.

Yfirlýsing Einars Magnússonar þar sem hann lofar að selja Brynjólfi biskup 3 hundraða hlut sinn í jörðinni Snotrunesi á Borgarfirði eystri fyrir aðra fastaeign eða lausafé. Einnig samþykkir hann að bræður hans, Bárður og Marteinn, selji Brynjólfi biskup sína hluta í jörðinni. Dags. að Meðalnesi í Fellum 22. mars 1658.

Þórunn Björnsdóttir samþykkir sölu eiginmanns síns, Bárðar Magnússonar, á hlut þeirra í jörðinni Snotrunesi á Borgarfirði eystri til Brynjólfs biskups. Einnig samþykkir Bjarni Magnússon sölu á hlut bræðra hans, Bárðar og Marteins, í Snotrunesi til biskups. Dags. að Snotrunesi 4. maí 1660. Afrit dags. í Skálholti 7. júlí 1660.

Árni Ketilsson kvittar fyrir að Hjalti Jónsson hafi afhent honum tvö hundruð, fyrir hönd Brynjólfs biskups. Dags. 28. apríl 1660. Afrit dags. í Skálholti 7. júlí 1660.

Bjarni Steingrímsson samþykkir kaup Brynjólfs biskups á jarðarhlutum bræðranna Einars, Bárðar og Marteins Magnússona í jörðinni Snotrunesi á Borgarfirði eystri. Dags. á Hjaltastað 5. maí 1660. Afrit dags. í Skálholti 7. júlí 1660.

Jarðabréf þar sem Hallur Björnsson seldi Brynjólfi biskup hálfa jörðina Saurstaði á Fljótsdalshéraði, sex hundruð að dýrleika. Fyrir þennan jarðarhlut greiddi biskup Halli tólf hundruð í lausafé, sem skyldu vera ríkisdalir og góðir katlar. Einnig fékk Hallur til ábýlis jörðina Höfn með Rauðabjörgum og sonur hans, Tumi Hallsson, skyldi erfa ábúðina eftir sinn föður. Dags. 14. apríl 1660. Afrit dags. í Skálholti 7. júlí 1660.

Oddur Eiríksson staðfestir að Brynjólfur biskup sé nú eigandi að 5 hundraða hlut í jörðinni Sólheimum í Mýrdal. Oddur hafði verið við skólavist í Skálholtsskóla um níu ára skeið og þessi jarðarhlutur var greiðsla fyrir skólavistina. Dags. í Skálholti 12. júlí 1660.

Brynjólfur biskup skrifar meðmælabréf fyrir Odd Eiríksson en Oddur hafði verið við skólavist í Skálholtsskóla um níu ára skeið. Gaf biskup honum sín bestu meðmæli og óskaði honum allrar gæfu í framtíðinni. Dags. í Skálholti 12. júlí 1660.

Jarðabréf þar sem Gísli Sigurðsson, í umboði föður síns sr. Sigurðar Oddssonar, seldi Brynjólfi biskup 3 hundraða og 3ja álna hlut í jörðinni Hofi í Öræfum. Fyrir þennan jarðarhlut greiddi Brynjólfur biskup Gísla 30 ríkisdali. Dags. í Skálholti 19. júlí 1660.

Brynjólfur biskup greiðir Erlendi Þorsteinssyni smið fyrir vinnu hans á Vatnsenda í Skorradal, frá haustinu 1659 þegar Erlendur fékk síðast greitt. Síðan þá hafði hann meðal annars byggt upp stóru baðstofuna, sængurhúsið, búrið og göngin. Fékk Erlendur greidd sex hundruð og 80 álnir fyrir vinnu sína. Dags. í Skálholti 19. júlí 1660.

Brynjólfur biskup skrifar sr. Þorleifi Jónssyni að Odda, prófasti í Rangárþingi, og sóknarmönnum Stórólfshvolskirkju og Skúmstaðakirkju. Í bréfinu tilkynnir hann þeim að hann hafi vígt sr. Gísla Bárðarson til sóknarprests í þessum tveimur kirkjusóknum. Dags. í Skálholti 28. júlí 1660.

Brynjólfur biskup skrifar sr. Magnúsi Péturssyni, prófasti í Skaftafellssýslu, Hákoni Þorsteinssyni sýslumanni, Magnúsi Þorsteinssyni klausturhaldara í Þykkvabæ og sóknarmönnum klausturkirkjunnar. Í bréfinu tilkynnir biskup að hann hafi vígt sr. Ketil Halldórsson til sóknarprests í klausturkirkjunni í Þykkvabæ í stað sr. Árna Claussonar sem tekið hafði við starfi sóknarprests í Vestmannaeyjum. Dags. í Skálholti 29. júlí 1660.

Í bréfinu er lýst yfir að Brynjólfur biskup hafi skilað Bjarna Eiríkssyni, ráðsmanni Skálholtsstaðar, umboðsbréfi þar sem Bjarni hafði veitt biskupi byggingarráð og umboð yfir jörðinni Hafrafelli á Fljótsdalshéraði. Afsalaði biskup sér þar með öll umráð yfir jörðinni. Dags. í Skálholti 30. júlí 1660.

Brynjólfur biskup greiðir Þórólfi Guðmundssyni 4 ríkisdali upp í andvirði jarðarinnar Syðri Grafar í Flóa en áður hafði biskup greitt Þórólfi aðra fjóra ríkisdali. Sjá jarðabréfið í AM 272 fol., nr. 233. Dags. í Skálholti 30. júlí 1660.

Brynjólfur biskup veitir sr. Jóni Marteinssyni embætti sóknarprests í Skeggjastaðakirkju á Ströndum og ábúð á jörðinni Skeggjastöðum. Sóknarmenn kirkjunnar höfðu óskað eftir sr. Jóni í embættið þar sem faðir hans, sr. Marteinn Jónsson, var áður sóknarprestur á Skeggjastöðum en var nú látinn. Í bréfinu er einnig lýst landamerkjum jarðarinnar Skeggjastaða. Dags. að Hofi í Vopnafirði 19. ágúst 1660.

Ólafur Jónsson á Ásbrandsstöðum í Vopnafirði skilar Brynjólfi biskup reikningi yfir meðteknar biskupstíundir á milli Smjörvatnsheiðar og Helkunduheiðar síðastliðin þrjú ár. Dags. á Ásbrandsstöðum í Vopnafirði 22. ágúst 1660.

Brynjólfur biskup og Bjarni Oddsson, sýslumaður á Burstafelli, riðu saman til að kanna landamerki á milli jarðanna Torfastaða og Nyrðra Skálaness í Vopnafirði en biskup hafði áður selt Bjarna jörðina Torfastaði. Fengu þeir vitnisburð fróðra manna um að greina beri Kiðuklett sem landamerki á milli þessara jarða. Nokkur ágreiningur reis á milli biskups og Péturs Bjarnasonar yngri, sonar Bjarna Oddssonar, um landamerki jarðanna en Pétur var eigandi Eystra Skálaness. Ákváðu þeir að leggja málið fyrir dómkvadda menn á næsta manntalsþingi á Ásbrandsstöðum. Dags. á Ásbrandsstöðum í Vopnafirði 22. ágúst 1660.

Samkomulag Brynjólfs biskups og Péturs Bjarnasonar yngri um rétt landamerki á milli jarðanna Nyrðra Skálaness, sem var eign biskups, og Eystra Skálaness, sem var í eigu hjónanna Péturs Bjarnasonar yngri og Elisabetar Joachimsdóttur. Í bréfinu er sér í lagi fjallað um fjörumörk á milli jarðanna. Einnig samþykktu þeir landamerki á milli jarðanna Ásbrandsstaða og Eystra Skálaness og handsöluðu að svo skyldu landamerkin standa um aldur og æfi. Dags. á Refstöðum í Vopnafirði 23. ágúst 1660. Afrit dags. á Refstöðum í Vopnafirði 23. ágúst 1660.

Vitnisburður þriggja manna, Jóns Þórðarsonar, Ólafs Þórðarsonar og Jóns Rafnssonar, þess efnis að Kiðuklettur væri rétt landamerki á milli jarðanna Torfastaða og Nyrðra Skálaness í Vopnafirði. Einnig staðfestu þeir að umræddur Kiðuklettur væri hinn eini rétti Kiðuklettur og hvergi væri annan Kiðuklett að finna. Dags. á Syðri Vík í Vopnafirði 23. ágúst 1660.

Vitnisburður Rafns Jónssonar, fyrrum umboðsmanns Gísla Oddssonar biskups yfir Torfastöðum og Nyrðra Skálanesi, þess efnis að Kiðuklettur sé rétt landamerki á milli jarðanna Torfastaða og Nyrðra Skálaness í Vopnafirði. Einnig staðfesti hann að umræddur Kiðuklettur væri hinn eini rétti Kiðuklettur og á jörðunum tveimur væri engan annan Kiðuklett að finna. Dags. á Ketilstöðum í Jökulsárhlíð 25. ágúst 1660.

Brevskriver : Bjarni Oddsson

Bjarni Oddsson, sýslumaður á Burstafelli, staðfestir að hann skuldi Brynjólfi biskup 4 hundruð sem hann lofar að greiða Hjalta Jónssyni, umboðsmanni jarða Brynjólfs biskups á Austfjörðum, á næstkomandi vori. Dags. á Ásbrandsstöðum í Vopnafirði 22. ágúst 1660.

Brevskriver : Bjarni Oddsson

Meðtekinn fiskur og innistæðukúgildi af jörðum Brynjólfs biskups á Austfjörðum sem Bjarni Oddsson hafði umboð fyrir. Dags. á Ásbrandsstöðum í Vopnafirði 22. ágúst 1660. Afrit dags. að Kirkjubæ 27. ágúst 1660.

Í bréfinu lýsir Pétur Bjarnason eldri yfir við ábúendur jarðanna Hestgerðis og Uppsala í Hornafirði að þeir skuli greiða Brynjólfi biskup, eða umboðsmanni hans, landskuld af jörðunum sem greiðast áttu sumarið 1659. Landskuld af Hestgerði nam alls einu hundraði auk leigu á tveimur kúgildum og af Uppsölum var landskuldin 10 aurar auk leigu á þremur kúgildum. Dags. á Burstafelli 21. ágúst 1660.

Í bréfinu lýsir Pétur Bjarnason eldri yfir við ábúendur jarðarinnar Kross í Mjóafirði að þeir skuli greiða Brynjólfi biskup eða Hjalta Jónssyni, umboðsmanni hans, landskuld af jörðinni sem greiðast átti sumarið 1659. Landskuld af jörðinni Krossi nam alls einu hundraði auk leigu á einu kúgildi. Dags. á Burstafelli 21. ágúst 1660.

Kaupmálabréf hjónaefnanna Bjarna Steingrímssonar og Vigdísar Hávarðsdóttur handsalaður í viðurvist Brynjólfs biskups, Hjalta Jónssonar og fimm trúlofunarvotta. Dags. á Desjamýri á Borgarfirði eystri 31. ágúst 1660.

Jarðabréf þar sem Brynjólfur biskup seldi Bjarna Steingrímssyni hálfa jörðina Saurstaði í Jökulsárhlíð, 6 hundruð að dýrleika. Á móti seldi Bjarni Steingrímsson Brynjólfi biskup 5 hundraða hlut í jörðinni Snotrunesi á Borgarfirði eystri. Einnig samþykkti biskup að Bjarni fengi ábúð á hálfri jörðinni Snotrunesi með þeirri kvöð að hann greiddi árlega landskuld uppá eitt hundrað og annaðist jörðina eins og góðum landseta bæri. Dags. í Njarðvík á Borgarfirði eystri 31. ágúst 1660.

Í bréfinu lofar Bjarni Magnússon að selja Brynjólfi biskup fyrstum allra hlut sinn í jörðinni Snotrunesi á Borgarfirði eystri, alls 2 hundruð að dýrleika, með því skilyrði að hann fengi þennan hlut til ábýlis, sem biskup samþykkti. Dags. í Njarðvík á Borgarfirði eystri 1. september 1660.

Afrit af vitnisburðum sex manna, Árna Sigurðssonar, Auðuns Steingrímssonar, Jóns Jónssonar, Jóns Einarssonar, Jóns Björnssonar og Hallvarðs Einarssonar um landamerki jarðarinnar Þorvaldsstaða í Skriðdal. Frumrit bréfanna, sem skrifuð voru á kálfskinn, voru rituð á árunum 1607-1608. Vitnisburðarblöðin sex fékk Brynjólfur biskup frá Einari Magnússyni lögréttumanni í Njarðvík. Dags. í Njarðvík á Borgarfirði eystri 1. september 1660.

Jarðabréf þar sem Kolbeinn Árnason seldi Brynjólfi biskup eins hundraðs hlut í jörðunum Kjólsvík og Snotrunesi á Borgarfirði eystri. Kaupin voru gerð með samþykki eiginkonu Kolbeins, Ragnhildar Steingrímsdóttur, en hún var eigandi þessara jarðarhluta. Fyrir þessa tvo jarðarhluta greiddi Brynjólfur biskup þeim hjónum 5 hundruð í góðum og gagnlegum peningum sem skyldu gjaldast við fyrstu hentugleika. Auk þess lofaði biskup að útvega þeim ábýli á ónafngreindri jörð á Austfjörðum. Dags. í Njarðvík á Borgarfirði eystri 1. september 1660.

Brynjólfur biskup veitir Kolbeini Árnasyni ábýli á allri kristfjárjörðinni Kóreksstöðum á Fljótsdalshéraði frá næstkomandi fardögum. Í bréfinu er lýst skilmálum byggingarbréfs kristfjárjarðar, meðal annars bar Kolbeini að taka að sér einn ómaga, fæða hann og klæða. Sjá bréf nr. 69. Dags. í Njarðvík á Borgarfirði eystri 1. september 1660.

Jarðabréf þar sem Erlendur Steingrímsson seldi Brynjólfi biskup 2 hundraða hlut í jörðinni Snotrunesi á Borgarfirði eystri. Fyrir þennan hlut greiddi biskup Erlendi 6 hundruð sem voru: Þriggja skjólna ketill, voð vaðmáls, tvær kýr og átta ríkisdalir. Að auki fékk Erlendur ábýli á 8 hundraða hlut jarðarinnar Snotruness. Dags. í Njarðvík á Borgarfirði eystri 1. september 1660.

Brynjólfur biskup veitir Bjarna Ögmundssyni ábýli á jörðinni Hrafnabjörgum á Útmannasveit en Bjarni hafði áður selt biskupi þessa jörð. Í bréfinu er einnig lýst landamerkjum jarðarinnar Hrafnabjarga. Dags. á Hjaltastöðum á Útmannasveit 2. september 1660.

Afrit af jarðakaupabréfi frá árinu 1649. Í bréfinu seldi Valgerður Hjörleifsdóttir syni sínum, Eiríki Bjarnasyni, jörðina Skálanes á Seyðisfirði, 6 hundruð að dýrleika, fyrir 6 hundruð í lausafé. Samkvæmt bréfinu hélt Valgerður ábýli á jörðinni Skálanesi á meðan hún lifði. Dags. á Stöðvarstað á Stöðvarfirði þriðjudaginn eftir Mikaelsmessu 1649. Staðfestingarbréf Valgerðar um jarðasöluna dags. á Stöðvarstað á Stöðvarfirði 29. maí 1651. Afrit dags. í Skaftafelli í Lóni 14. september 1660.

Afrit af gjafabréfi þar sem Ingibjörg Sigurðardóttir gaf syni sínum, Bjarna Jónssyni, alla jörðina Snotrunes á Borgarfirði eystri, alls 20 hundruð að dýrleika. Þessi gjörningur fór fram árið 1586, níu árum áður en hann var skjalfestur. Í bréfinu lýsir Ingibjörg einnig landamerkjum jarðarinnar Snotruness. Dags. í Jórvík á Útmannasveit þriðjudaginn í fardagaviku 1595. Afrit dags. í Skálholti 11. október 1660.

Afrit af bréfi þar sem sr. Þorgeir Þorsteinsson gefur vitnisburð um landamerki á milli jarðanna Snotruness og Njarðvíkur á Borgarfirði eystri, að beiðni Bjarna Jónssonar á Snotrunesi. Sjá bréf nr. 74. Dags. á Skriðuklaustri í Fljótsdal 22. febrúar 1610. Afrit dags. í Skálholti 11. október 1660.

Afrit af bréfi þar sem Halldór Símonarson gefur vitnisburð um landamerki á milli jarðanna Snotruness og Njarðvíkur á Borgarfirði eystri, að beiðni Bjarna Jónssonar á Snotrunesi. Sjá bréf nr. 74. Dags. í Brúnavík á Borgarfirði eystri 1610. Afrit dags. í Skálholti 11. október 1660.

Afrit af bréfi þar sem Þórarinn Guðmundsson og Brandur Oddsson gefa vitnisburð um landamerki jarðarinnar Snotruness á Borgarfirði eystri. Báðir voru þeir vel staðkunnugir en Þórarinn hafði búið á Borgarfirði eystri í 70 ár en Brandur í 40 ár. Dags. á Stóru Breiðavík á Borgarfirði eystri 1. ágúst 1630. Afrit dags. í Skálholti 11. október 1660.

Afrit af bréfi þar sem Hjálmar Þorgeirsson gefur vitnisburð um landamerki á milli Snotruness og Geitavíkur á Borgarfirði eystri, að beiðni Hjörleifs Bjarnasonar. Dags. 23. febrúar 1632. Afrit dags. í Skálholti 11. október 1660.

Steingrímur Bjarnason lögfestir að jörðin Snotrunes sé nú lögleg eign hans og hans bræðra eftir lát föður þeirra, Bjarna Jónssonar. Sjá bréf nr. 74. Í bréfinu er lýst landamerkjum jarðarinnar og lýst yfir að engum sé heimilt að nýta nokkurt land innan þessara marka án leyfis þeirra bræðra. Bréfið er ódags. Afrit dags. í Skálholti 11. október 1660.

Á blaði 48v er einungis þessi utanáskrift bréfs. Bréfið sjálft er ekki í bókinni og þess er ekki getið í registri bókarinnar. Um jarðakaupin, sjá bréf nr. 87.

Yfirlit yfir öll viðskipti og gjörninga á milli Brynjólfs biskups og Bjarna Oddssonar, sýslumanns á Burstafelli í Vopnafirði, frá árinu 1643 til og með 1659. Dags. á Burstafelli í Vopnafirði 21. ágúst 1660.

Brevskriver : Bjarni Oddsson

Bjarni Oddsson sýslumaður á Burstafelli í Vopnafirði lýsir yfir að hann skuldi Brynjólfi biskup 4 hundruð sem hann lofar að greiða Hjalta Jónssyni, umboðsmanni jarða biskups á Austfjörðum, næstkomandi vor. Dags. á Ásbrandsstöðum í Vopnafirði 22. ágúst 1660.

Brevskriver : Bjarni Oddsson

Yfirlit yfir afgjöld af jörðum Brynjólfs biskups sem Bjarni Oddsson hafði umboð yfir og skyldu greiðast Hjalta Jónssyni, umboðsmanni jarða biskups á Austfjörðum, árið 1660. Dags. á Ásbrandsstöðum í Vopnafirði 22. ágúst 1660.

Fjórir erindrekar Brynjólfs biskups skoða og meta húsakost á jörðinni Kvískerjum í Öræfum. Niðurstaða þeirra er að umgengni ábúanda jarðarinnar sé til fyrirmyndar en hann hafði haft jörðina til ábúðar síðastliðin 17 ár. Dags. á Kvískerjum í Öræfum 24. október 1661.

Sex erindrekar Brynjólfs biskups skoða og lýsa húsakosti á konungsjörðunum Uppsölum og Hestgerði í Hornafirði. Pétur Bjarnason eldri hafði haft þessar jarðir sem lén í mörg ár en sagði sig frá léninu á Alþingi sumarið 1660. Nú tók Halldór Brynjólfsson við léni þessara jarða. Í þessu bréfi er húsakosti á Uppsölum lýst. Sjá einnig næsta bréf. Dags. 23. október 1661.

Fimm erindrekar Brynjólfs biskups skoða og lýsa húsakosti á konungsjörðinni Hestgerði í Hornafirði. Dags. í Hestgerði 23. október 1661.

Brynjólfur biskup skrifar meðmælabréf fyrir Jón Pálsson að beiðni föður hans, Páls Björnssonar, en Jón hafði stundað nám við Skálholtsskóla í tvo eða þrjá vetur. Brynjólfi biskup virðist Jón hafa hegðað sér meinlauslega og lýtalaust í sinni skólavist og hann hafi ætíð komið vel fram. Biskup óskar honum allra góðra heilla. Dags. í Skálholti 21. nóvember 1661.

Ásmundur Torfason staðfestir að Brynjólfur biskup hafi greitt sér 8 ríkisdali upp í andvirði jarðarinnar Kirkjubóls á Stöðvarfirði, en Ásmundur hafði selt biskupi 16 hundraða hlut í jörðinni. Lýsir hann yfir að Brynjólfur biskup sé nú fullkominn eigandi þessa jarðarhluta. Óskar hann þó eftir að fá greidd afgjöld af þessum 16 hundraða hlut þar til biskup afhendir honum aðra fastaeign. Sjá AM 272 fol., nr. 287 og 288. Dags. að Eydölum í Breiðdal 9. september 1660.

Bréfið er prentað í bókinni Úr bréfabókum Brynjólfs Sveinssonar. Sjá Jón Helgason (útg.). Úr bréfabókum Brynjólfs Sveinssonar. Safn Fræðafélagsins um Ísland og Íslendinga XII, bls. 127. Kaupmannahöfn: Hið íslenzka fræðafélag, 1942.

Sr. Ketill Eiríksson, nývígður sóknarprestur að Desjamýri (sjá bréf nr. 93A), staðfestir að Brynjólfur biskup hafi afhent sér Íslandssögubók á pappír. Þessa bók lofaði sr. Ketill að afhenda Einari Þorsteinssyni að Felli í Mýrdal en greiða verð bókarinnar ef hún skemmdist á leiðinni. Reiknaðist þeim að verð bókarinnar væri tvö hundruð og þrjár álnir, fyrir utan pappírsverðið. Samkvæmt Jóni Helgasyni er þetta handrit nú AM 115 fol. Dags. í Skálholti 25. nóvember 1661.

Bréfið er yfirstrikað í handritinu.

Sr. Ketill Eiríksson, nývígður sóknarprestur að Desjamýri (sjá bréf nr. 93A), kvittar fyrir að Brynjólfur biskup hafi afhent honum 30 ríkisdali. Þessa peninga lofaði sr. Ketill að afhenda sr. Magnúsi Péturssyni, prófasti í Skaftafellssýslu, og biðja sr. Magnús að senda biskupi til baka staðfestingu á að hann hafi meðtekið þessa fjármuni. Dags. í Skálholti 25. nóvember 1661.

Bréfið er yfirstrikað í handritinu.

Jarðabréf þar sem Brynjólfur biskup seldi Bjarna Eiríkssyni, ráðsmanni Skálholtsstaðar, 3 hundraða og 3ja álna hlut í jörðinni Hofi í Öræfum og 7 hundraða hlut í jörðinni Narfastöðum í Melasveit. Auk þess fékk Bjarni 5 hundruð í góðum og gagnlegum peningum. Í staðinn fékk Brynjólfur biskup af Bjarna Eiríkssyni hálfa jörðina Skinney í Hornafirði, 10 hundruð að dýrleika. Dags. í Höfðavík 31. júlí 1660.

Jarðabréf þar sem Brynjólfur biskup seldi hjónunum sr. Jóni Höskuldssyni og Halldóru Bjarnadóttur hálfa jörðina Skinney í Hornafirði, 10 hundruð að dýrleika. Í staðinn keypti Brynjólfur biskup af þeim hjónum alla jörðina Hvol á Borgarfirði eystri, 8 hundruð að dýrleika. Einnig afhenti sr. Jón Höskuldsson Brynjólfi biskup jörðina Aragerði á Fáskrúðsfirði, 2 hundruð að dýrleika. Í staðinn lofaði biskup að taka son þeirra hjóna, Orm, til skólavistar í Skálholtsskóla um næstkomandi þrjú ár. Dags. að Hálsi við Hamarsfjörð 12. september 1660.

Brynjólfur biskup veitir Hjalta Jónssyni áframhaldandi umboð yfir jörðum biskups á Austfjörðum auk biskupstíundarumboðs fyrir sunnan Smjörvatnsheiði. Fyrir þetta umboðsstarf fékk Hjalti í sinn hlut þriðjung allra innheimtra afgjalda. Í bréfinu er að finna nákvæma lýsingu á skyldum Hjalta sem umboðsmanns jarða biskups. Dags. á Stóra Sandfelli í Skriðdal 5. september 1660.

Reikningur yfir greiðslur Brynjólfs biskups til Þórólfs Guðmundssonar vegna kaupa biskups á jörðinni Syðri Gröf í Flóa. Bréfið er ódags.

Brynjólfur biskup vígir sr. Jón Eiríksson í embætti sóknarprests í Berufjarðar og Berunesskirkjum frá næstu fardögum og veitir honum ábúð á kristfjárjörðinni Búlandi. Sr. Jón hafði áður þjónað sem aðstoðarprestur hjá bróður sínum, sr. Halldóri Eiríkssyni í Eydölum, en hafði fyrst og fremst sinnt störfum prests í Berunesskirkju á Berufjarðarströnd. Dags. í Skálholti 15. nóvember 1661.

Kaupmálabréf hjónaefnanna Sigurðar Guðnasonar og Katrínar Finnsdóttur upplesið og staðfest í viðurvist Brynjólfs biskups og trúlofunarvotta. Dags. á Snjallshöfða í Landmannahreppi 5. október 1660.

Síðari hluti bréfsins er glataður.

Bréf nr. 97 er glatað. Samkvæmt registri bókarinnar var titill þess "Copia af veitingarbréfi Jóhanns Klein 1660".

Jón Ásmundsson skilar Brynjólfi biskup reikningi yfir biskupstíundir úr Árnessýslu sem gjaldast áttu árið 1660. Dags. í Skálholti 18. október 1660.

Fyrri hluti bréfsins er glataður. Titill er skrifaður eftir registri bókarinnar.

Filipus Ormsson afhendir Brynjólfi biskup reikning yfir biskupstíundir úr Rangárvallasýslu sem Magnús Þorsteinsson hafði umboð fyrir. Bréfið er ódags.

Afrit af jarðabréfi frá árinu 1417 í uppskrift bréfsins frá árinu 1457. Í bréfinu seldi Járngerður Ormsdóttir Gunnlaugi Guðmundssyni hálfa jörðina Torfastaði og hálfa jörðina Skálanes, báðar í Vopnafirði. Í bréfinu er lýst hlunnindum sem fylgdu jörðunum, meðal annars torfskurði, reka og veiði. Ekki kemur fram hvenær Brynjólfur biskup lét afrita bréfið í bréfabók sína. Dags. í Krossavík ytri á Vopnafirði trinitatis sunnudag 1417. Afrit dags. í Bjarnarnesi í Hornafirði föstudaginn eftir Krossmessu að vori 1457.

Afrit af gömlu jarðabréfi frá árinu 1398 í uppskrift þess frá árinu 1487. Í bréfinu seldi Ólafur Jónsson sr. Guðmundi Þorsteinssyni jörðina Bessastaði í Fljótsdal. Á móti seldi sr. Guðmundur Ólafi Jónssyni tvær jarðir í Vopnafirði, Torfastaði og Skálanes. Í bréfinu er lýst landamerkjum á milli jarðanna Torfastaða og Ljótsstaða og á milli Skálaness eystra og Ásbrandstaða. Ekki kemur fram hvenær Brynjólfur biskup lét afrita bréfið í bréfabók sína. Dags. á Bessastöðum í Fljótsdal sunnudaginn fyrir Marteinsmessu 1398. Afrit dags. á Hallormsstað í Fljótsdal föstudaginn fyrir páska 1487.

Brynjólfur biskup skrifar Jóhanni Klein, nýjum fógeta á Bessastöðum. Í upphafi bréfsins blessar biskup nýjan fógeta og embætti hans og óskar honum farsældar í nýju starfi. Biskup vonast eftir liðsinni fógeta varðandi málefni sóknarprests í Seltjarnarnessþingum. Hann vonar að sr. Snjólfur Einarsson samþykki færslu í starfi svo sr. Björn Stefánsson, sonur Úlfhildar í Nesi, geti tekið við starfi sóknarprests í Nesi og verið um leið móður sinni styrkur og stoð. Þessi ráðstöfun sé ekki fær nema með samþykki sr. Snjólfs og biður biskup um liðsinni fógeta við að útvega sr. Snjólfi jafngott prestakall. Dags. í Skálholti 4. nóvember 1660.

Bréf Brynjólfs biskups til sr. Snjólfs Einarssonar sóknarprests í Seltjarnarnessþingum. Í bréfinu segir biskup að hann hafi hlotið samþykki Jóhanns Klein fógeta við að fara þess á leit við sr. Snjólf að hann segi sig frá embætti sóknarprests í Nesi fyrir annað jafngott prestakall. Þar með geti sr. Björn Stefánsson tekið við embætti sóknarprests í Nesi. Vonar biskup að sr. Snjólfur samþykki þessa ráðstöfun í nafni kristilegs kærleika. Sjá AM 272 fol., nr. 237, 238 og 294. Dags. í Skálholti 4. nóvember 1660.

Sr. Þórður Jónsson í Hítardal kvittar fyrir að hafa móttekið 5 ríkisdali frá Brynjólfi biskup sem voru landskuld af jörðunum Kálfafelli og Skinney í Hornafirði fyrir árið 1659. Dags. á Þingvöllum 1. júlí 1660. Afrit dags. í Skálholti 13. nóvember 1660.

Sr. Halldór Eiríksson ásamt sex erindrekum gera úttekt á Valþjófstaðarkirkju og stað að beiðni Brynjólfs biskups. Biskup hafði frétt að kirkju og bæjarhús Valþjófstaðar væru orðin mjög hrörleg og óskaði því eftir áliti þess efnis og hve miklu þyrfti að kosta til endurbóta. Álit skoðunarmanna var að kirkjan þarfnaðist skjótra endurbóta. Bæjarhúsin voru sum sterk og stæðileg en mörg hrörleg eða að niðurfalli komin. Bar þeim saman um að kostnaður við endurbætur húsanna væri umtalsverður, líklega um 10 hundruð. Dags. á Valþjófstað í Fljótsdal 27. september 1660.

Bréf Brynjólfs biskups til sóknarmanna Höfðabrekkukirkju í Mýrdal. Daginn áður hafði biskupi borist fréttir af miklu jökulhlaupi og eldgosi í Mýrdalsjökli sem ollið hefðu miklu tjóni í sókninni. Svo sé Guði fyrir að þakka að enginn hafi hlotið skaða af eða misst líf sitt. Í jökulhlaupinu sópaðist sóknarkirkjan á Höfðabrekku burt og staðurinn gjöreyddist og var það í höndum biskups að finna lausn á svo sóknarbörn fengju Guðs orð að heyra og altaris sakramenti að meðtaka. Næsta kirkja, Reyniskirkja, var of lítil til að taka við sóknarbörnum Höfðabrekku og taldi biskup einu færu leiðina að embætta í Kerlingadal þar sem var hálfkirkja, þar til hægt yrði að byggja að nýju upp sóknarkirkju á Höfðabrekku. Dags. í Skálholti 27. nóvember 1660.

Jarðabréf þar sem Jón Halldórsson færir Brynjólfi biskup til eignar eitt hundraðs hlut í jörðinni Haugum í Stafholtstungum, en þessi hlutur var metinn á 3 hundruð. Var þessi jarðarpartur greiðsla fyrir skólavist Jóns í Skálholtsskóla. Dags. í Skálholti 3. desember 1660.

Magnús Þorsteinsson skilar Brynjólfi biskup reikningi yfir meðtekin afgjöld úr Skammbeinstaðaumboði fyrir árið 1660 auk biskupstíunda úr Rangárþingi sem gjaldast áttu sama ár. Dags. í Skálholti 14. desember 1660.

Jón Þorvaldsson greiðir Brynjólfi biskup 6 ríkisdali sem voru eftir ógreiddir úr biskupstíundarumboði Magnúsar Þorsteinssonar í Rangárþingi fyrir árið 1660. Sjá bréf nr. 108. Dags. í Skálholti 3. mars 1661.

Þorvarður Magnússon skilar Brynjólfi biskup reikningi yfir afgjöld úr Heynessumboði fyrir árið 1660. Einnig skilaði hann til biskups reikningi yfir skipaútgerðarumboð sitt á Akranesi og í Hvalfirði fyrir sama ár. Í bréfinu veitir Brynjólfur biskup Þorvarði ábúð á dómkirkjujörðinni Bæ í Borgarfirði, auk áframhaldandi umboðs fyrir Heynesi og skipaútgerðarumboð á Akranesi og í Hvalfirði. Dags. í Skálholti 16. desember 1660.

Að beiðni Þorvarðar Magnússonar umboðsmanns voru sex menn kvaddir til að meta sexæring á Skipaskaga á Akranesi sem Brynjólfur biskup átti í félagi við Þorkel Guðmundsson sýslumann. Matsmennirnir voru sammála um að skipið væri ekki meira en eins hundraðs virði. Dags. á Skipaskaga á Akranesi 11. október 1660.

Hreppstjórnarmenn í Borgarhreppi voru fengnir til að skrifa upp og meta ástand og virði búfjár á bænum Ölvastöðum að beiðni sr. Halldórs Jónssonar. Dags. á Ölvastöðum í Borgarbyggð 30. október 1661. Afrit dags. í Skálholti 30. desember 1661.

Blað 80v er autt.

Blað 81r er autt.

Brynjólfur biskup skrifar Pétri Bjarnasyni eldri vegna jarða sem Pétur hafði að léni í Múlasýslu og Hornafirði en sagði frá sér á Alþingi sumarið 1660. Voru þetta jarðirnar Brimnes, Kross, Uppsalir og Hestgerði. Óskar biskup eftir að Pétur afhendi þessar jarðir um næstu fardaga, með kúgildum og öðru sem tilheyrir, Hjalta Jónssyni, umboðsmanni jarða Brynjólfs biskups á Austfjörðum, og sr. Jóni Bjarnasyni. Biskup vill að afhendingu hverrar jarðar fylgi veitingarbréf og fjögur kúgildi. Óskar hann eftir skriflegu svari og samþykki frá Pétri um þetta efni. Bréfið er ódags. Afrit dags. í Skálholti 24. desember 1660.

Modtager : Bjarni Oddsson

Brot úr sendibréfi Brynjólfs biskups til Bjarna Oddssonar sýslumanns á Burstafelli. Í bréfinu segir biskup að hann hafi fengið í hendur veitingarbréf Halldórs Brynjólfssonar, frænda síns, fyrir konungsjörðunum sem áður voru lénsjarðir Péturs Bjarnasonar eldri, sonar Bjarna Oddssonar. Í veitingarbréfinu er tekið fram að hverri jörð fylgi 4 innistæðukúgildi. Biður biskup Bjarna Oddsson að sjá til þess að kúgildaleiga jarðanna verði í lagi þegar Halldór tekur við léni þeirra um næstu fardaga. Sjá bréf nr. 113. Bréfið er ódags. Afrit dags. í Skálholti 24. desember 1660.

Svar Brynjólfs biskups við bréfi sem Rafn Jónsson lögréttumaður og ábúandi á kristfjárjörðinni Ketilstöðum í Jökulsárhlíð hafði skrifað honum. Í bréfi Rafns kom fram að nauðsynlegt sé að flytja bæjarhús Ketilstaða úr stað, ástæðan kemur þó ekki fram í bréfinu. Rafn vill ekki ráðast í þessar miklu framkvæmdir nema hann fái loforð biskups um að synir hans, Jón og Eiríkur, fái áframhaldandi ábúð á Ketilstöðum eftir sinn dag. Í bréfinu samþykkir biskup þessa beiðni með þeim fyrirvara að konungur hafi önnur áform. Biskup á ekki von á því enda hafi Skálholtsbiskupar haft byggingarráð yfir kristfjárjörðum konungs frá "áraldurs tíð". Dags. í Skálholti 19. desember 1660. Afrit dags. í Skálholti 24. desember 1660.

Brot úr bréfi sr. Sigurðar Árnasonar til Brynjólfs biskups. Í bréfinu tilkynnir sr. Sigurður að Steingrímur Oddsson hafi samþykkt að selja biskupi 9 hundraða hlut í jörðinni Stóru Breiðavík fyrir 9 hundraða hlut í jörðinni Stuðlum á Reyðarfirði. Dags. á Skorrastað 28. október 1660. Afrit dags. í Skálholti 24. desember 1660.

Brevskriver : Árni Oddsson

Árni Oddsson lögmaður staðfestir að Þorvarður Magnússon, umboðsmaður Heynessumboðs, hafi afhent honum 20 vættir smjörs. Lofar Árni að greiða Benedikt Halldórssyni, sýslumanni í Hegranesþingi, andvirði smjörsins. Dags. að Leirá 8. september 1660.

Brevskriver : Hjalti Jónsson

Hjalti Jónsson, umboðsmaður jarða Brynjólfs biskups á Austfjörðum, staðfestir að hann hafi meðtekið smjörgjöld af landsetum Bjarna Eiríkssonar á Austfjörðum, alls 8 vættir og sex fjórðunga. Dags. í Meðalnesi 3. nóvember 1660. Afrit dags. í Skálholti 24. desember 1660.

Brynjólfur biskup skrifar ábúendum konungsjarðanna Brimness á Seyðisfirði og Kross í Mjóafirði. Í bréfinu tilkynnir hann þeim að Pétur Bjarnason eldri, sem hafði þessar jarðir að léni, hafi sagt umboði sínu upp á Alþingi sumarið 1660. Í staðinn hafi Tómas Nikulásson, fógeti á Bessastöðum, veitt Halldóri Brynjólfssyni umboðið frá og með næstkomandi fardögum. Dags. í Skálholti 21. desember 1660. Afrit dags. í Skálholti 24. desember 1660.

Brynjólfur biskup staðfestir köllunarbréf sr. Árna Vigfússonar til sóknarprests á Hólmastað á Reyðarfirði, en sóknarmenn höfðu kosið sr. Árna í embætti nýs sóknarprests í stað sr. Rögnvalds heitins Einarssonar. Dags. í Skálholti 23. desember 1660.

Brot úr bréfi Guðmundar Torfasonar til Brynjólfs biskups. Í bréfinu tilkynnir Guðmundur að hann sé ósáttur við að Daði Jónsson hafi selt Brynjólfi biskup eitt hundraðs hlut í jörðinni Þorleifsstöðum þar sem Daði hafi gefið sér loforð um að selja sér þetta jarðarhundrað. Dags. á Keldum 16. nóvember 1660. Afrit dags. í Skálholti 1660.

Brevskriver : Hjalti Jónsson

Brot úr bréfi Hjalta Jónssonar til Brynjólfs biskups þar sem hann tilkynnir að smjör og fiskur sem hann hefur meðtekið af jörðum biskups á Austfjörðum hafi verið komið í geymslu á Ásbrandstöðum í Vopnafirði. Dags. í Meðalnesi 3. nóvember 1660. Afrit dags. í Skálholti 1660.

Brynjólfur biskup vígir sr. Ólaf Sigfússon til aðstoðarprests hjá sr. Eiríki Bjarnasyni sóknarpresti á Hallormsstað. Sr. Eiríkur var orðinn aldurhniginn og sjóndapur og taldi sér ekki fært að sinna embættisskyldum sínum án aðstoðar. Dags. í Skálholti 27. desember 1660.

Brynjólfur biskup vígir sr. Árna Vigfússon til sóknarprests á Hólmastað á Reyðarfirði og veitir honum ábúð á jörðinni Hólmum á Reyðarfirði. Sr. Árni var vígður í dómkirkjunni í Skálholti 30. desember 1660 og því næst sendur austur til að taka að sér embættið. Dags. í Skálholti 2. janúar 1661.

Brynjólfur biskup staðfestir að hann hafi meðtekið biskupstíundir úr Árnessýslu frá Jóni Ásmundssyni umboðsmanni sem greiðast áttu vorið 1660. Dags. í Skálholti 29. janúar 1661.

Yfirlit yfir öll viðskipti Brynjólfs biskups við Pál Gíslason á Hvanneyri, lögréttumann og fyrrum umboðsmann í Heynesumboði, frá árinu 1644 og til síðustu viðskipta sem fram fóru þeirra á milli árið 1658. Bréfið er ódags.

Sendibréf Ólafs Sigfússonar til Brynjólfs biskups þar sem hann samþykkir að selja biskupi tvær jarðir í Vopnafirði, Vakurstaði, átta hundruð að dýrleika, og Hróaldsstaði, sex hundruð að dýrleika, fyrir jörðina Fagranes á Langanesi, 12 hundruð að dýrleika. Dags. í Meðalnesi föstudaginn fyrsta í vetri 1661. Afrit dags. í Skálholti 14. nóvember 1661.

Yfirlit yfir skuldaskil á milli Brynjólfs biskups og Bjarna Eiríkssonar árin 1660-1661, vegna afgjalda af jörðum biskups sem Bjarni hafði umboð fyrir. Dags. í Skálholti 4. febrúar 1661.

Jarðabréf þar sem Bjarni Eiríksson seldi Brynjólfi biskup sjö hundraða hlut í jörðinni Narfastöðum í Melasveit. Fyrir þennan jarðarhlut greiddi biskup Bjarna 84 ríkisdali. Dags. í Skálholti 4. febrúar 1661.

Brevskriver : Bjarni Eiríksson

Bjarni Eiríksson staðfestir að Brynjólfur biskup hafi greitt sér 84 ríkisdali sem voru andvirði sjö hundraða hlutar í jörðinni Narfastöðum í Melasveit. Dags. í Skálholti 5. febrúar 1661.

Bjarni Eiríkson ráðsmaður Skálholtsstaðar gerir upp skuld sína við Brynjólf biskup. Dags. í Skálholti 5. febrúar 1661.

Brynjólfur biskup staðfestir að Bjarni Eiríksson hafi staðið skil á afgjöldum og inntektum Skálholtsstaðar í ráðsmannsumboði sínu milli Þjórsár og Hvítár fyrir síðastliðin tvö ár, 1659 og 1660. Einnig veitir hann Bjarna áframhaldandi ráðsmannsumboð. Dags. í Skálholti 5. febrúar 1661.

Brynjólfur biskup afhendir Halldóri Einarssyni yfirbryta í Skálholti til eignar eftirstöðvar úr Tungnaumboði, eins og þær stóðu nú og fram til næstu fardaga. Dags. í Skálholti 5. febrúar 1660.

Fyrir neðan bréfið er yfirstrikaður minnispunktur Brynjólfs biskups þess efnis að hann hafi lánað Jóni Magnússyni á Vatnsenda 4 ríkisdali sem Jón lofar að endurgreiða um næstu Jónsmessu. Dags. 15. febrúar 1661.

Modtager : Þorlákur Bjarnason

Brot úr bréfi Brynjólfs biskups til sr. Þorláks Bjarnasonar, prófasts og sóknarprests á Helgafelli. Sr. Þorlákur hafði afráðið að láta af embættinu um næstu fardaga og Brynjólfur biskup lofar að láta þá kennimenn sem honum eru nálægir vita af þessum ásetningi sr. Þorláks. Nefnir biskup í bréfinu þrjá presta sem hann telur að sýna muni áhuga á embættinu, bræðurna Teit og Einar Torfasyni og Illuga Vigfússon. Dags. 25. mars 1661.

Gísli Sigurðsson kvittar fyrir að Bjarni Eiríksson hafi greitt honum leigugjald fyrir tvö kúgildi með Narfastöðum sem greiðast áttu árið 1660. Dags. í Skálholti 29. mars 1661.

Brynjólfur biskup veitir Snorra Jónssyni dómkirkjujörðina Hóla í Flóa til ábýlis, svo lengi sem biskup hefur umráð yfir jörðinni og svo lengi sem Snorri leggur rækt við jörð og hús, greiðir landskuld og heldur við jörðina fjórum kúgildum. Dags. í Skálholti 1. apríl 1661.

Jarðabréf þar sem sr. Gísli Þóroddsson prestur á Klausturhólum seldi Brynjólfi biskup hálfa jörðina Skáldabúðir í Eystrihrepp, 5 hundruð að dýrleika, en þessi jörð var móðurarfur sr. Gísla og bróður hans, Vilhjálms. Fyrir þennan 5 hundraða jarðarhlut greiddi Brynjólfur biskup sr. Gísla 15 hundruð auk ábýlis á ótilgreindri jörð ef hann skyldi hverfa frá Klausturhólum. Dags. í Skálholti 1. apríl 1661.

Á eftir jarðabréfinu fylgir samkomulag þeirra Brynjólfs biskups og sr. Gísla Þóroddssonar um leigu á fimm kúgildum sem biskup skyldi greiða sr. Gísla yfir fimm ára tímabil, frá 1661-1665. Dags. í Skálholti 20. janúar 1664.

Brevskriver : Árni Oddsson

Modtager : Gísli Þóroddsson

Brot úr bréfi Árna Oddssonar lögmanns til sr. Gísla Þóroddssonar á Klausturhólum. Í bréfinu lýsir Árni yfir að sr. Gísla sé heimilt að selja Brynjólfi biskup helmingshlut í jörðinni Skáldabúðum, þó Árni telji sig eiga nokkuð tilkall til erfða í jörðinni eftir föður sinn. Dags. 17. september 1660.

Finnur Jónsson, forstöðumaður spítalans á Klausturhólum, afhendir sr. Gísla Þóroddssyni Klausturhólakirkju og stað en sr. Gísli hafði verið vígður í embætti sóknarprests á Klausturhólum. Í bréfinu er lýsing á kirkjunni, innviðum hennar og eignum, einnig lýsing á bæjarhúsum Klausturhóla. Dags. á Klausturhólum í Grímsnesi 22. maí 1660.

Brynjólfur biskup auglýsir fyrir nokkrum prestum að embætti sóknarprests á Helgafelli sé laust til umsóknar. Þetta voru þeir sr. Sigurður Torfason, sr. Árni Halldórsson, Ólafur Jónsson og Oddur Eyjólfsson. Þar með gaf biskup þessum prestum möguleika á að sækjast eftir þessari stöðu. Sr. Árni, Ólafur og Oddur lýstu strax yfir að þeir myndu ekki sækjast eftir embættinu en sr. Sigurður Torfason var ekki tilbúinn að gefa það frá sér að svo stöddu. Sjá bréf nr. 135. Dags. í Skálholti 11. apríl 1661.

Brevskriver : Sigurður Torfason

Í bréfinu lofar sr. Sigurður Torfason, dómkirkjuprestur í Skálholti, að sækjast ekki eftir stöðu sóknarprests á Helgafelli til að standa ekki í vegi fyrir Gísla Einarssyni, skólameistara í Skálholtsskóla, sem sóttist eftir embættinu. Þessu lofaði sr. Sigurður svo framarlega sem sr. Gísli verði löglega kosinn í embættið. Dags. í Skálholti 18. apríl 1661.

Ólafur Jónsson kvittar fyrir að honum hafi verið greidd árslaun fyrir starf sitt sem heyrari í Skálholtsskóla, alls 12 ríkisdali, auk 8 ríkisdala sem voru eftir ógreiddir. Dags. í Skálholti 11. apríl 1661.

Brevskriver : Einar Torfason

Einar Torfason lýsir yfir að hann sækist ekki eftir embætti sóknarprests á Helgafelli. Þessi yfirlýsing var gerð að beiðni Gísla Einarssonar, skólameistara í Skálholtsskóla, en hann sóttist eftir embættinu. Dags. í Skálholti 3. júní 1661.

Jarðabréf þar sem Narfi Einarsson seldi Brynjólfi biskup eitt hundrað og 80 álna hlut í jörðinni Gröf í Grímsnesi. Fyrir þennan jarðarhlut greiddi biskup Narfa 5 hundruð í ríkisdölum, kötlum og geldum nautum. Fékk Narfi strax greidda 10 ríkisdali, nautin skyldu greiðast í fardögum og katlarnir í sumar í kauptíð. Að auki fékk Narfi ábýli á ónefndri jörð í Grímsnesi. Í lok bréfsins er kvittun fyrir greiðslu á nautum og kötlum til Narfa Einarssonar. Dags. í Skálholti 16. apríl 1661.

Sama bréf og bréfið á undan, nr. 145.

Í bréfinu lýsir Brynjólfur biskup yfir að hann hafi selt sr. Sigurði Torfasyni eitt hundraðs hlut í jörðinni Haugum í Stafholtstungum. Fyrir þennan jarðarhlut greiddi sr. Sigurður 10 ríkisdali. Dags. í Skálholti 23. apríl 1661.

Brynjólfur biskup veitir Bjarna Eiríkssyni ráðsmanni Skálholtsstaðar heimild til búsetu á dómkirkjujörðinni Kotferju í Flóa, hvort sem Bjarni kýs að búa sjálfur á jörðinni eða leiguselja hana öðrum til ábýlis. Dags. í Skálholti 23. apríl 1661.

Jarðabréf þar sem Halldór Einarsson, yfirbryti í Skálholti, seldi Brynjólfi biskup þriðjungshlut í jörðinni Kvískerjum í Öræfum, tvö hundruð að dýrleika. Fyrir þennan jarðarhlut greiddi Brynjólfur biskup Halldóri sex hundruð, sem skyldu vera fjögur málnytukúgildi, nýr mælisketill auk fjögurra ríkisdala sem skyldu greiðast nú þegar. Auk þess fékk Halldór ónefnda dómkirkjujörð til ábýlis. Dags. í Skálholti 3. maí 1661.

Jarðabréf þar sem Sigurður Einarsson seldi Brynjólfi biskup þriðjungshlut í jörðinni Kvískerjum í Öræfum, tvö hundruð að dýrleika. Fyrir þennan jarðarhlut greiddi Brynjólfur biskup Sigurði sex hundruð, sem skyldu vera 12 ríkisdalir og þrjú málnytukúgildi. Einnig fékk Sigurður loforð biskups um ábýli á jörð Skálholtsdómkirkju, ef hann með þyrfti. Dags. í Skálholti 7. maí 1661.

Bréfið er prentað í bókinni Úr bréfabókum Brynjólfs Sveinssonar. Sjá Jón Helgason (útg.). Úr bréfabókum Brynjólfs Sveinssonar. Safn Fræðafélagsins um Ísland og Íslendinga XII, bls. 123. Kaupmannahöfn: Hið íslenzka fræðafélag, 1942.

Eiður Ragnheiðar Brynjólfsdóttur þar sem hún sver að hún sé enn óspillt mey og hafi aldrei átt í holdlegu sambandi við karlmann. Eiður Ragnheiðar fór fram í dómkirkjunni í Skálholti í viðurvist héraðsprófastsins, sr. Torfa Jónssonar, sem var kvaddur til að beiðni Brynjólfs biskups. Vottar að þessum eiði voru sr. Sigurður Torfason, dómkirkjuprestur og sálusorgari Ragnheiðar, og sjö aðrir prestvígðir menn. Lýstu þeir allir yfir að þeir hefðu "góða samvisku með Ragnheiði um hennar sakleysi og sannleika þessa eiðs". Dags. í Skálholti 16. apríl 1661. Afrit dags. í Skálholti 15. maí 1661.

Sr. Þorleifur Clausson prestur á Útskálum skilar Brynjólfi biskup reikningi, meðal annars vegna skipaútgerðar á Útskálum. Dags. á Útskálum 17. maí 1661.

Brynjólfur biskup lýsir yfir að þann 1. apríl 1661 hafi hann keypt helmingshlut í jörðinni Skáldabúðum í Eystrihrepp, 5 hundruð að dýrleika, af sr. Gísla Þóroddssyni. Þessu kaupi var lýst fyrir Gottskálk Oddssyni og í framhaldinu gert samkomulag við hann um sættargreiðslu, en Gottskálk hafði erft 3 hundraða hlut í jörðinni eftir eiginkonu sína, Jóhönnu Einarsdóttur. Dags. í Skálholti 20. maí 1661.

Sr. Sigurður Torfason dómkirkjuprestur í Skálholti staðfestir að Brynjólfur biskup hafi greitt sér árslaun fyrir síðasta ár, alls 20 ríkisdali, frá fardögum 1660 til fardaga 1661. Dags. í Skálholti 23. maí 1661.

Bréfið er prentað í bókinni Úr bréfabókum Brynjólfs Sveinssonar. Sjá Jón Helgason (útg.). Úr bréfabókum Brynjólfs Sveinssonar. Safn Fræðafélagsins um Ísland og Íslendinga XII, bls. 123. Kaupmannahöfn: Hið íslenzka fræðafélag, 1942.

Eiður Ragnheiðar Brynjólfsdóttur þar sem hún sver að hún sé enn óspillt mey og hafi aldrei átt í holdlegu sambandi við karlmann. Eiður Ragnheiðar fór fram í dómkirkjunni í Skálholti í viðurvist héraðsprófastsins, sr. Torfa Jónssonar, sem var kvaddur til að beiðni Brynjólfs biskups. Vottar að þessum eiði voru sr. Sigurður Torfason, dómkirkjuprestur og sálusorgari Ragnheiðar, og sjö aðrir prestvígðir menn. Lýstu þeir allir yfir að þeir hefðu "góða samvisku með Ragnheiði um hennar sakleysi og sannleika þessa eiðs". Þetta bréf er eiður Ragnheiðar Brynjólfsdóttur í frumriti með undirskrift eiðsvottanna. Afrit eiðsins er í bréfi nr. 151. Dags. í Skálholti 11. maí 1661.

Reikningur Sigmundar Jónssonar, umboðsmanns yfir Herdísarvíkurbúi, sendur Brynjólfi biskup. Reikningurinn nær yfir síðastliðið ár, frá fardögum 1660 til fardaga 1661. Dags. 26. maí 1661.

Gísli Einarsson skólameistari í Skálholtsskóla sendir Brynjólfi biskup reikning vegna kaupgjalds síns fyrir síðastliðið ár, alls var kaup Gísla 15 hundruð og 5 álnir. Dags. í Skálholti 28. maí 1661.

Afhending á jörðinni Drumboddstöðum til Brynjólfs biskups. Í bréfinu er húsakosti jarðarinnar lýst og kúgildaeign. Dags. á Drumboddstöðum 23. maí 1661. Afrit dags. í Skálholti 29. maí 1661.

Brynjólfur biskup greiðir Erlendi Þorsteinssyni smið laun fyrir vinnu sína á Vatnsendagrund í Skorradal, frá 1. júlí 1660, þegar Erlendur fékk síðast greidd laun, og til næsta sunnudags fyrir jólaföstu, eða alls 26 vikur. Fékk Erlendur meðal annars greidda 40 ríkisdali, 9 fjórðunga smjörs og einn fjórðung járns. Sjá bréf nr. 50. Dags. í Skálholti 28. maí 1661.

Jarðabréf þar sem hjónin Guðmundur Jónsson og Guðrún Einarsdóttir seldu Brynjólfi biskup tveggja hundraða og 20 álna hlut í jörðinni Gröf í Grímsnesi, en Guðrún hafði erft þennan jarðarhlut eftir foreldra sína. Fyrir þennan hlut greiddi Brynjólfur biskup þeim hjónum 2 hundruð og 20 álnir sem voru: Mælisketill, tveir ríkisdalir og 20 álnir í kúgildum sem skyldu greiðast í sumar. Auk þess fengu þau til ábýlis hálfa dómkirkjujörðina Útey. Dags. í Skálholti 3. júní 1661.

Bréf Brynjólfs biskups til sóknarmanna Staðarkirkju við Súgandafjörð. Í bréfinu auglýsir biskup fyrir sóknarmönnum kirkjunnar að hann hafi vígt sr. Jón Torfason til sóknarprests í Staðarkirkju auk þess sem hann veitti honum ábýli á jörðinni Stað. Einnig bar sr. Jóni að þjóna í Hólskirkjusókn í Bolungarvík. Var sr. Jón prestvígður í dómkirkjunni í Skálholti þriðja dag Hvítasunnu 1661. Dags. í Skálholti 4. júní 1661.

Bréf Brynjólfs biskups til sóknarmanna Helgafellskirkju á Snæfellsnesi. Í bréfinu auglýsir biskup fyrir sóknarmönnum kirkjunnar að hann hafi vígt sr. Gísla Einarsson, skólameistara í Skálholtsskóla, í embætti sóknarprests á Helgafelli. Var sr. Gísli vígður til Helgafellssóknar í dómkirkjunni í Skálholti þriðja dag Hvítasunnu 1661. Sjá bréf nr. 135, 141-2 og 144. Dags. í Skálholti 5. júní 1661.

Jarðabréf þar sem Þormóður Einarsson seldi Brynjólfi biskup þriðjungshlut í jörðinni Kvískerjum í Öræfum, 2 hundruð að dýrleika. Fyrir þennan jarðarhlut greiddi Brynjólfur biskup Þormóði fimm málnytukúgildi og fjóra ríkisdali. Auk þess fékk Þormóður dómkirkjujörð í Árnessýslu til ábúðar. Dags. í Skálholti 6. júní 1661.

Brevskriver : Þórður Jónsson

Í bréfinu biður sr. Þórður Brynjólf biskup um að lána sér 41 alin vaðmáls til að afhenda Thomasi Jobsyni, þar sem erfitt var að útvega vaðmál fyrir vestan. Lofar sr. Þórður að greiða lánið til baka í vaðmáli eða hverju öðru sem biskup kýs.

Fyrir neðan bréfið kvittar Thomas Jobson fyrir að Margrét Halldórsdóttir hafi afhent sér 41 alin vaðmáls vegna sr. Þórðar Jónssonar árið 1660. Bréf Þórðar er dags. í Hítardal 28. júlí 1660. Kvittun Thomasar er ódags. Afrit dags. á Vatnsendagrund í Skorradal 9. júní 1661.

Brynjólfur biskup afhendir Bjarna Hallgrímssyni, vegna Margrétar Halldórsdóttur, til eignar skuldaviðurkenningu sr. Þórðar í Hítardal vegna láns á 41 alin vaðmáls. Biður biskup sr. Þórð um að greiða Bjarna þetta vaðmál. Sjá bréf nr. 164. Dags. á Vatnsendagrund í Skorradal 9. júní 1661.

Páll Teitsson, umboðsmaður yfir Heynesumboði, afhendir smjör úr Heynesumboði til Vatnsendagrundar í Skorradal. Bréfið er ódags.

Páll Teitsson umboðsmaður yfir Heynesumboði skilar Brynjólfi biskup reikningi yfir meðtekna landskuld af jörðum biskupsins í Borgarfirði um fardaga 1661. Bréfið er ódags.

6 menn voru tilkallaðir af Páli Teitssyni, umboðsmanni yfir Heynesumboði, til að meta búfé sem Teitur Helgason gaf Brynjólfi biskup í próventugjöf með jörðinni Höfn í Melasveit. Dags. að Höfn í Melasveit 25. maí 1661.

Gísli Sigurðsson kvittar fyrir að Brynjólfur biskup hafi afhent sér 4 ríkisdali sem var greiðsla fyrir leigukúgildi sem fylgja átti með jörðinni Höfn í Melasveit. Dags. á Vatnsendagrund í Skorradal 9. júní 1661.

Skuldaviðurkenning þar sem Jón Jónsson á Krossi staðfestir að Brynjólfur biskup hafi lánað sér 20 ríkisdali. Lofar Jón að endurgreiða féð í síðasta lagi um næstu fardaga, 1662. Bréfið er ódags.

Bréfið er yfirstrikað í handritinu.

Brynjólfur biskup kvittar fyrir að hann hafi greitt Jóni Jónssyni landskuld af jörðinni Grafarkoti sem Jón átti inni hjá biskupi. Dags. á Vatnsendagrund í Skorradal 9. júní 1661.

Blaði 128r-129v er bréf nr. 172 í frumriti. Blöðin eru í brotinu 4to og eru bundin inn í bókina.

Blað 129r er autt.

Blað 129v er aðeins titill bréfsins: Kaupbréf fyrir hálfum Hvammi í Skorradal með hálfu Hvammsengi á Andakýl af Gísla Sigurðssyni við Guðmund Einarsson í Straumfirði. Anno 1661, 16. apríl.

Jarðabréf þar sem Guðmundur Einarsson seldi Brynjólfi biskup hálfa jörðina Hvamm í Skorradal, átta hundruð að dýrleika, og 2 hundraða hlut í jörðinni Hvammsengi í Andakýl. Fyrir þessa tvo jarðarhluta greiddi Brynjólfur biskup Guðmundi 70 ríkisdali. Gísli Sigurðsson gerði samninginn í umboði Brynjólfs biskups. Dags. að Álftanesi við Borgarfjörð 16. apríl 1661. Afrit dags. að Vatnsendagrund í Skorradal 10. júní 1661.

Brynjólfur biskup falaðist eftir að kaupa jörðina Hvanneyri með Hamrakoti af Páli Gíslasyni og í bréfinu er að finna skilyrði Páls fyrir jarðasölunni. Biskup þakkar Páli fyrir að gefa sér tíma til að skoða þessi mál en telur að hann og hans erfingjar verði í engu betur staddir með þessum viðskiptum. Hann hafnar því skilyrðum Páls og ekkert varð úr jarðakaupunum. Dags. að Vatnsendagrund í Skorradal 11. júní 1661.

Jarðabréf þar sem Páll Gíslason seldi Brynjólfi biskup hálfa jörðina Brúsholt í Flókadal, 8 hundruð að dýrleika. Fyrir þennan jarðarhlut greiddi Brynjólfur biskup Páli 24 hundruð í þeim peningum sem þeim um semdist. Dags. að Vatnsendagrund í Skorradal 10. júní 1661.

Jarðabréf þar sem Pétur Þórðarson seldi Brynjólfi biskup hálfa jörðina Breið í Skaga á Akranesi, 5 hundruð að dýrleika. Fyrir þennan jarðarhlut greiddi biskup Pétri 15 hundruð sem skyldu vera í "ríkisdölum, kaupstaðagjaldi og öðrum gagnlegum aurum". Dags. að Gröf í Skilmannahreppi 13. júní 1661.

Brynjólfur biskup afhenti Daða Jónssyni frá Melum 40 ríkisdali sem hann átti að færa Pétri Þórðarsyni upp í andvirði jarðarinnar Breið í Skaga. Einnig greiddi biskup reikning Péturs Þórðarsonar við Lauritz Thiloffson kaupmann á Hvalfjarðareyri uppá 15 vætta gildi. Sjá bréf nr. 175. Dags. á Þingvöllum 1661.

Brynjólfur biskup greiðir Páli Gíslasyni upp í andvirði jarðarinnar Brúsholts í Flókadal. Sjá bréf nr. 174. Í titli bréfsins er vísað í bréf nr. 227 þar sem biskup gerir að fullu upp skuld sína við Pál. Bréfið er ódags.

Jarðabréf þar sem Nikulás Illugason, með samþykki eiginkonu sinnar Guðrúnar Nikulásdóttur, seldi Brynjólfi biskup 5 hundraða hlut í jörðinni Þingnesi í Borgarfirði fyrir 10 hundruð í lausafé. Dags. á Austara Miðfelli á Hvalfjarðarströnd 14. júní 1661.

Jarðabréf þar sem Brynjólfur biskup seldi hjónunum Nikulási Einarssyni og Kristínu Magnúsdóttur alla jörðina Beitistaði í Leirársveit, 12 hundruð að dýrleika. Á móti seldu þau hjón Brynjólfi biskup 5 hundraða hlut í jörðinni Skipaskaga á Akranesi en þessi partur jarðarinnar kallaðist Lambhúsapartur. Með kaupunum fylgdi að Nikulás skyldi hafa byggingarráð á þessum jarðarhlut, hann myndi eignast helmingaskip við biskupinn og annast skipshluta biskupsins. Dags. á Vatnsendagrund í Skorradal 16. júní 1661.

Jarðabréf þar sem Brynjólfur biskup seldi Finni Jónssyni 15 hundraða hlut í jörðinni Austara Miðfelli á Hvalfjarðarströnd. Í staðinn seldi Finnur Brynjólfi biskup 9 hundraða hlut í jörðinni Ytra Súlunesi í Melasveit og 6 hundruð í jörðinni Gullberastöðum í Lundarreykjadal. Dags. á Vatnsendagrund í Skorradal 6. júní 1661.

Brynjólfur biskup kvittar fyrir að Salomon Jónsson hafi greitt afgjöld af jörðinni Hestgerði fyrir árið 1660, alls 5 ríkisdali. Dags. á Þingvöllum 30. júní 1661.

Gísli Sigurðsson kvittar fyrir að Brynjólfur biskup hafi greitt sér 5 ríkisdali sem voru landskuld af 5 hundruðum í Skinney og 10 hundruðum í Kálfafelli í Hornafirði sem sr. Þórður Jónsson í Hítardal átti. Lofaði Gísli að afhenda sr. Þórði greiðsluna og senda Brynjólfi biskup til baka kvittun sr. Þórðar fyrir móttöku fjárins. Brynjólfur biskup fékk staðfestingu sr. Þórðar í hendur 13. júlí 1661. Dags. á Þingvöllum 30. júní 1661.

Daði Jónsson staðfestir að hann hafi móttekið 40 ríkisdali frá Brynjólfi biskup til að færa Pétri Þórðarsyni á Innra Hólmi á Akranesi, vegna kaupa biskups á hálfri jörðinni Breið á Skaga. Í bréfinu er einnig kvittun Pétur Þórðarson fyrir móttöku þessara ríkisdala. Sjá bréf nr. 175 og 176. Dags. á Þingvöllum 1. júlí 1661. Staðfesting Péturs er dags. við Katanes 17. ágúst 1661.