Skinn.
Brotið er í góðu ásigkomulagi, nokkuð slétt og mynd er skýr. Engar glufur eða göt. Nokkrir blettir. Gylling og litir hafa flagnað nokkuð. Jaðrar blaðs eru dekkri en miðja. Skorið hefur verið af blaði. Hluti af laufaskrauti á hægri hlið hefur verið skorinn burt.
Óþekktur skrifari.
Mynd af Kristi á krossinum. María stendur honum á hægri hönd en Jóhannes postuli honum á vinstri hönd. María er í blágrænum kjól og bleikum kyrtli, fóðruðum með hermilíni sem hefur tekið á sig ljósbláan lit. Jóhannes er klæddur í dökkgrænan kyrtil og bláa skikkju. Hún er með rósbleiku fóðri og hann heldur á rósbleikri bók. Kristur hefur blágrænt lendarklæði. Sjá má rautt blóð drjúpa úr höndum hans og fótum, sem og brjóstkassa. Krossinn skiptir bakgrunni í fjóra köflótta reiti. Í vinstra horni uppi og hægra horni niðri er bleikur bakgrunnur en í vinstra horni niðri og hægra horni uppi er blár bakgrunnur. Krossinn er gylltur og með bleikri rönd í miðju. Utan um myndina er tvöfaldur rammi. Innri ramminn er bleikur vinstra megin og blár hægra megin. Hann er skreyttur á fernan hátt. Gylltir reitir eru í öllum hornum. Ytri ramminn er gylltur og með laufaskrauti, rauðu, bláu og gylltu, úr öllum fjórum hornum.
Út frá samanburði við aðrar síður úr sama handriti sést að litir hafa fölnað nokkuð.
SHH skráði 24. júní 2021.